بۆچی ئیمارات بەشێک نییە لە پیلانگێڕی دژی رۆژئاوای کوردستان؟
٢٣ کانوونی دووەم ٢٠٢٦ - ١:٠٠ پاش نیوەڕۆ
پەنجەرە
لەکاتێکدا سعودیە و قەتەر بەهەموو هێزێکیانەوە پاڵپشتی ئەحمەد شەرع دەکەن بۆ هێرشکردنە سەر رۆژئاوای کوردستان، بەڵام ئیمارات لەدەرەوەی پیلانگێڕیەکەیە.
بەپێی وتەی چەند لێکۆڵەرێکی نێودەوڵەتی بۆ پەنجەرە، سعودیە و قەتەر جگە لەوەی دەیانەوێت هێزێکی سونی بەهێز دژی ئێران لە ناوچەکە دروست بکەن، هاوکات بەشێک لە جموجۆڵەکانیان لە دژی ئیماراتە.
لەئێستادا سعودیە و قەتەر تاڕادەیەک لەگەڵ ئیسرائیل تەبا نین، لەکاتێکدا ئیمارات و ئیسرائیل لە یەمەن، سۆماڵ و سودان پرۆژەی هاوبەشیان هەیە، هەر ئەمەش وایکرد سعودیە هێرش بکاتە سەر بەرژەوەندییەکانی ئیمارات.
سەبارەت بە بێدەنگی ئیسرائیل لەکاتێکدا سعودیە و قەتەر لە دژی دەجوڵێن، چاودێران دەڵێن ئیسرائیل بەشێک لە خاکی سوریای پێدراوە و ڕازیکراوە، هەروەها لەلایەن ئەمەریکاوە ئاگادار کراوەتەوە بێدەنگی هەڵبژێرێت.
چاودێران دەڵێن، کوردی رۆژئاوا هیچ پەیوەندییەکی بە ناکۆکی نێوان بەرەی ئیسرائیل و ئیمارات لەلایەک، بەرەی سعودیە و تورکیا و قەتەر لەلاکەی تر نەبووە، بەڵام بووە قوربانی یارییە سیاسییەکان.
بەپێی زانیارییەکانی پەنجەرە، تەنانەت پارتی دیموکراتی کوردستانیش ترسی لە دۆخەکە هەیە، بەوپێیەی لە ئیماراتەوە نزیکە و ترسی هەیە پریشکی کێشەکانی بەر بکەوێت.