"هەڕەشەیە بۆ سەر خێزان"؛ عێراق یاری "لودۆ"ـی قەدەغە کرد
٩ کانوونی یەکەم ٢٠٢٥ - ١١:١٥ پێش نیوەڕۆ
پەنجەرە
وەزارەتی گەیاندنی عێراق، بڕیاری قەدەغەکردن (بلۆککردن)ـی یاری ئەلیکترۆنی "لودۆ"ـی لە سەرجەم تۆڕەکانی ئینتەرنێتی وڵات دەرکرد و هۆکارەکەشی بۆ "پاراستنی خێزانەکان" گەڕاندەوە.
یاری لودۆ چییە؟
یاریی لودۆ بریتییە لە ئەپڵیکەیشنێکی ئەلیکترۆنیی بۆ مۆبایلە زیرەکەکان، کە هەمان یاریی لودۆی کلاسیکی دەگوازێتەوە بۆ جیهانی ئینتەرنێت و ڕێگە بە بەکارهێنەران دەدات لەگەڵ هاوڕێیان یان یاریزانانی دیکە لە سەرانسەری جیهاندا ڕکابەری بکەن.
ئەپڵیکەیشنە بەناوبانگەکانی وەک "Yalla Ludo" و "Ludo King" چەندین تایبەتمەندیی وەک گفتوگۆی دەنگی، ژووری چات، و شێوازی جیاوازی یاری (وەک تاکەکەسی یان بە کۆمەڵ) لەخۆدەگرن، بە ئامانجی دروستکردنی کەشێکی کۆمەڵایەتی و کاتبەسەربردن.
هۆکاری قەدەغەکردنەکەی
وەزارەتی گەیاندنی عێراق، لە بەیاننامەیەکدا ڕایگەیاندووە: "یارییەکە بووەتە هۆی دروستبوونی کێشەی قوڵ لەنێوان هاوسەران و خێزانەکاندا، بەهۆی ئەو سیستەمە گرەوکردنەی (قومار) کە تێیدا پەیڕەو دەکرێت و دەبێتە هۆی ئەنجامدانی کاری مەترسیدار."
بەپێی بەیاننامەکە، بڕیارەکە دوای چاودێریکردنێکی ورد دێت، کە دەرکەوتووە ژوورە دەنگی و چاتییەکانی ناو یارییەکە (وەک ئەپڵیکەیشنەکانی Yalla Ludo و Ludo King) بوونەتە ژینگەیەک بۆ هەراسانکردنی ئەلیکترۆنی، بڵاوکردنەوەی ناوەڕۆکی نەشیاو و لەخشتەبردنی ڕەگەزیی، کە ڕاستەوخۆ هەڕەشەن بۆ سەر سەقامگیریی خێزان.
بەوتەی شارەزایان، گرفتی سەرەکی گۆڕینی یارییەکەیە بۆ سەکۆیەک بۆ قومار و گرەوکردنی دارایی لەلایەن گەنجانەوە، ئەگەرنا یارییەکە خۆی ئەپێکی کاتبەسەربردنە.
پێشتریش هەواڵی ئەوە بڵاوبوویەوە کە پیاوێکی عێراقی بەهۆی ناکۆکی لەسەر یارییەکە، لە تشرینی یەکەمی ٢٠٢٣ هەستاوە بە کوشتنی ژنەکەی.